Zjarret që u përhapën në ishullin grek të Rodosit detyruan mijëra të largoheshin nga hotelet e tyre. Shumë familje janë detyruar të flejnë në dyshekë të shtruar në dysheme në një sallë konferencash hoteli, ndërsa të tjerat janë duke kërkuar dëshpërimisht për strehim alternativ.
Më shumë se 3,500 njerëz janë evakuuar nga toka dhe deti. Shërbimi zjarrfikës i Greqisë ka kërkuar falje dhe paralajmëroi se situata mund të përkeqësohet. 1200 të tjerë do të evakuohen nga tre fshatra – Pefki, Lindos dhe Kalathos.
Rodosi është duke luftuar me zjarret e ndezura nga erërat e forta që nga e marta, ndërsa Evropa po përballet me një valë sfiduese të të nxehtit.
Lesley Young, i cili mbërriti në Lindos, Rodos të shtunën në mëngjes, tha se nuk mund të shkonin në hotelin e tyre sepse ishte evakuuar.
Nënkryetari i bashkisë së Rodos ka paralajmëruar se nuk ka mjaftueshëm ushqime bazike dhe problemet janë “shumëfishuar”.
“Ka vetëm ujë dhe disa ushqime rudimentare, ne nuk kemi dyshekë dhe shtretër,” tha Athanasios Vyrinis.
Nënkryetari i bashkisë tha se njerëzit po përdornin kuti kartoni për të fjetur dhe njerëzit që mbërrinin në Rodos nuk kishin ku të qëndronin.
Autoritetet greke po u bëjnë thirrje vendasve që të dhurojnë artikuj për mëngjes si briosh dhe fruta, pasi shumë turistë ankohen për mungesën e një plani në lidhje me ushqimin.
